حسین آرزو نون شعرلری
حسین آرزو شعر اوخویور
رضا همراز
جنوبی آذربایجانین شعر و ادب دونیاسیندا حسین آرزو لقبی ایله تانینان حسین ستان وند گونش ایلی 1345 ینجی ایل قوجا تبریزین محله لرینین بیریسینده آنادان اولوب ؛ ائله بو شهرده ایسه بویا – باشا چاتمیشدیر . حسین آرزو ان گنج چاغلاریندان ادبیاتا ماراق گوستریب ؛ اوز اوشاقلیق دونیاسیندا بیر شئی لر یازاردی . آنجاق سونرالار آیاغی ادبی درنگ لره آچیلدیقدا شعرلرینه صیقل وئریب تورکجه دن علاوه فارسجادا یازمیشدیر . حسین آرزو شاعیرلیک دن دولایی روزنامه چی لییه ده اوز گتیرمیشدیر . او تهران و تبریز مطبوعاتیندا ادبیات ساحه سینده قلم ویران شاعیر و یازیچی لاردان اولموشدور . سون نئچه ایلده اوندان خبر سیز اولسامدا ؛ بیر سیرا شعرلری ایله سانکی اوزون گوروردوم . بورادا بو شاعیرین بیر نئچه یئنی تیپ داشییان شعرینین ائشیدمه ینه سیزه قوناق ائتمه ک ایسته یب ؛ شاعیر و یازیچی دوستوموزا هارادا اولسا ؛ جان ساغلیغی اولو تانری دان ایسته ییرم .
باخیش (1)
یئرده بولودلاری گوردوم
آیاق اوستونده باخیردی منه
آغاجین اوستونده.
باخیش (2)
باخ منه
اوتور گلن یوللاردا
نه صاباح
نه اوستانبول .
یاغیش (2)
دیلیم دیلیمه دولاشیر
دولاشاندا سنین دیلینده !
اونوتما او گونلری .
یاغیش (2)
یاغمور یاغیلیور
اوستانبولون سوکاک لاریندا
سن سیز .
آی (1)
آی اوزلو
گوزل گوزلو
ندن سندن قاچیرلار
مارال لار
گوی گوزلو مارال لار ؟
گوزوم – پنجره
تبریز یاغیر پنجره دن
باخاندا محله نین آغاجلارینا
بیر اوشاق آناسیندان قاچیری
یولداشین گورنده
اوتورموش خیاوانین قیراغیندا
بیر دوعا ائیله یین دیلنچی
گوزوم پنجره ده
تبریزی تبریز اوشاغینی – آنانی – یولداشی
پنجره گوزومده
قاری – محله نی – خیاوانی – دیله نچی نی
پنجره گوزومده
گوزوم پنجره ده .
دوه چی ده
دوه
چی
هرگون
گون چیخمادان میشو داغلاری
سالامی سه په لیر الی حنالی
من او گون توی خونچالارین دا
خوروزو
تویوغو
تاباقدا گوردوم
اوتایدا عینالی
باخیر تبریزه
تبریزین سوزلرین
سهنده یازدیم
الیمی الینده توتموشدو ننه
تبریزده
دوه چی
دوه چی ده
دوه
چی
گول کیمین بیر قوجا
ساققالی حنا
باخدی گوزلریمه
اوخودو ماهنی
" دوه لر قاطار قاطار
گل بالاوین دوه سین آپار
آپارماسان شیلاق آتار "
اوشاق (1)
یایی هر آیدان چوخ سئومیشدیم
اوشاقلیقدان
یایدا
هئچ کیمسه جوراب گئیمه زدی
آیاقلاری
آیاقلارین بارماقلارینی
من بارماغا عاشیق ایدیم
سوزدن چوخ ؛ سوزو یوخ
بارماقدان تانی یارام
انسانی
انسان اوغلونو
انسانین قیزینی
من یایی آیاغی
بارماغی
انسانی
سئومیشدیم
اوشاقلیقدان .
من رضا همراز صاحب این وبلاگ تاکنون حدود پانصد مقاله بلند و کوتاه به دو زبان ترکی و فارسی نوشته ، در چندین کنگره حضور یافته ،چندین کتاب ام چاپ و نشر شده اند و چندین کتاب چاپ نشده و یا آماده چاپ دارم .ایمیل من چنین هست: