sizin hamraz

بیر شهرین اوچ محله سی

رضا همراز

1-      هاوا اوره یه یاتیم دئییل . نفس چکنده سانکی زیر – زبیل قوخوسو آدامین کوکسون دئشیر . آخشام اوستو اوشاق – موشاق سسی آدامی داها بئزیکدریر . بیر آز اوتندن سونرا یاتماق واختی چاتیر . یای اولدوغونا گوره کیچیک و دینقیلی حیه طین بیر بوجاغیندا باشیمی آتیب ؛ یاتیرام . گئجه نی سحره کیمی ایلان ویران یاتیر ؛ من یاتانمیرام . بیر یاندان خورولتو سسی ؛ بیر یاندان میغ – میغا لارین سسی ؛ بیر یاندان سوسه ری لرین اوخومالاری و بیر یاندان ایسه ایت لرین هوروشمه لری آمانیمی کسمیشدی لر . تزه ایسته ییردی گوزلریمه یوخو دولا ؛ بیر ساهاتین زنگی یوخ ؛ ایکی ساهاتین زنگی یوخ ؛ بلکه آز بیر فاصله ده هله قولاغیما ده ین نئچه ساهاتین زنگی هامی نی ایش – کوج اوچون اویادیر .

آز بیر زاماندان سونرا ؛ کوچه دن باش آچیق ؛ آیاق یالین اوغلان – قیزلارین دئیینتی لری ائشیدیلیر . هله یاتدیغیم یئردن دورمامیشام . داها دوغروسو ائشیددییم سسلره مات قالمیشام . آنجاق باشیم آلتینا قویولموش قیرخیم میته ککه یه سویکه نمیشم . داها سونرا ده فه و ماهنی سسی ائشیدیرم .

بیر ساری سال بیر قره

شانه ویریب تئللره

توک زولف لرین آغ اوزه

قوربانام او هونره

تبریز فرشی توخورسان ؛ نه اورک دن اوخورسان

ائله کی سن باخیر سان یاندیریرسان یاخیرسان

دفعه نی ویر گول بوتا

آغیز پوسته لب قونچا

گول قونچه لر ایچینده

نیه قالمیسان یالقیز

تبریز فرشی توخورسان ؛ نه اورک دن اوخورسان

ائله کی سن باخیر سان یاندیریرسان یاخیرسان

 

هله لیک هاوا بیر اوقدر ده پیس دئییل .

 

2-   بو دونه نفس چکنده داها  سینسیمیره م . درین – درین نفس چکدیکده دئییره م ائله نفس چکیم . ائله ده یورغون دئییلم . آخشام ؛ چول – پالازین سالجاق ؛ نیلوفر لرین اوره یی اوخشایان قوخولاری سانکی بیر مهربان آنا سایاق آداما لای – لای چالیرلار . باغچانین بیر بوجاغیندا باشیمی پرقو بالینجینا آتیب ؛ به به ؛ نه هاوادی ... بیردن گونش اوزومه سه ریلیر . قولومداکی ویستین واچ ساهاتینا باخاندا ؛ گورورم سحر اون یاریم دی . ال – اوزومو یویوب آخماقایا چوره گی ایله بال کره نی یئییب و بازارا طرف یوللانیرام ...

3-هله یای قورتارماییب . هاوانین ایلیق لیغی واردیر . بیر الینده ابپک دستمالا نه اولدوسون بیلمه دییم ؛ او بیری الینده ایسه چوخ گوزل یونولموش چه لییه سویکه نمیش ؛ دادلی – دوزلو قوجانی گوروره م . هاوا دئمک قارانلیق لاشما قرارینا گلمیش ؛ قاش قارالیر. ائله بوحالدا محله دن اذان سسی قوزانیب ؛ منیم فیکریمی دسته ؛ دسته مچیده گئدنلره ساری چکیر . منده مچیده طرف یوللانیرام . دستماز آلیب ؛ نامازیمی قیلیب و سونرا ائوه طرف یوللانیرام . ائوده بیر آز محرم نامه اوخویوب ؛ باشیمی آتیب ؛ یاتیرام . شیرین یوخو ایچینده اولسامدا ؛ دئمک یوخودان دویماقدایام کی ؛ بئش – آلتی نفرین اذان سس لری منی یوخودان اویاندیریب ؛ صبح نامازیمی قیلماغا تکلیف ائدیرلر . نامازیمی قیلیب ؛ یئنه باشیمی یئکه یون میتکه نین اوستونه آتیب " هله قوی بیر آزدا هوش لانیم دئییره م ...