sizin hamraz

ادبی وصیت نامه لر

خوش گوردوک سیزی عزیز دوستلاریم

تیر آیی نین 15 و 16 ینجی گونلری تهراندا ایدیم . حله ایستی – توستوسو بیر طرفده ؛ شیرین و آجی بیر منظره لرایله قاباق قارشی دا دایاندیم . بیر نئچه قوجامان عالیم لریمیزی گئدیب یاخیندان گوردوم . اونلارین یاشام طرزلرین یقین کی سیز مندن یاخشی بیلیرسیز . اونلار 60- 70 ایللر بویو چتین بیر شرایط لرده شهردن – شهره ؛ کند ن – کنده ؛ اولکه دن – اولکه یه گئدیب بیر چوخ ماتیریاللار توپلامیشلارکی ؛ ایندی یالنیز اونلاردا تاپماق مومکون دی . باشقا طرف دن ایسه بیر سیرادا قلمداشلار اوز وصیت لری اساسیندا بیر سیرا یازی – پوزولارین ائله همین یازیچی و عالیم لره اتحاف ائتمیشلر کی بلکه اونلارین تشبث لری ایله اونلار بیر گون چاپ اولسون لار . تاسف له بو ایش چوخ واخت لار عملی اولمایب هئچ ؛ بلکه بیر آتدیم دا آتیلمامیشدیر !  دئدییم کیمی تهراندا بیر اوستادین ائوینده بیر – ایکی ساعات قوناق اولدوقدا ؛ نه  دیرلی یازیلارین گوردوم . اونون اوز یازی لاریندان علاوه باشقا یازیچی لارین دا یازی لارینا راستلاشدیم کی او دوستوموز نه اوزو اونلارین حاقیندا بیر ایش گورموشدو  نه ده باشقا سینا تیکه توتوردو کی گلین سیز بیر ایش گورون . او عالی جناب کیتابی الینه آلاندا اللری ده تیتره ییردی . من اونو قینامیرا م نییه کی عومور- گونون پیسدن – یاخشی دان سووموشدو . اما نه ایسه بو جناب او یازی لاری ایکی اللی باغرینا باسمیشدیر ؟ او گوره – گوره کی دوخسانا یاخینلاشیب و الیندن داها بیر ایش گلمه ییر نه ایسه اوز یازی لاری هئچ ؛ آنجاق باشقالارینین اوندا اولان یازی لارینا دا بیر چاره و فیکیر قیلانمیردی . باشقا یئرلرده گوزل بیر دب کیمی گئدن یا خود مود اولان بیر ایش کیمی یئر آلان ادبی وصیت نامه لر یازیلیر . بویوک – کیچیک یازیچی و شاعیرلرین بیر سیراسی هله دیری کن بیر ادبی وصیتنامه ترتیب وئرمیشلر کی مثلا مندن سونرا منیم یازی – پوزومو وئرین فلان کسه . البته بو ایش اونلارین دیری لیک لرینده ده عملی اولوب . اورنک ایچون سید حسن تقی زاده ؛ صادق مستشارالدوله و ... اولندن سونرا یازی لاری ایرج افشارین الینه چاتیب ؛ اودا سیرا ایله چاپ ائتمیشدیر .ماراقلی دیر کی ایرج افشار اولمه میشدن اونجه وصیت ائتمیشدیر کی بوتون آرشیوین " دایره المعارف بزرگ اسلامی " یه وئرسین لر تا اورادا یاخشی وضعیت ده قورونسون . اما بیزلرده من گاهدان باخیرام رحمتلی پروفسور حمید محمد زاده ؛ پروفسور حمید نطقی ؛ گنجعلی صباحی ؛ بولود قاراچورلو ( سهند ) ؛ دوقتور سلام الله جاوید ؛ حاج حسین آغا صحاف ؛ سلیمان امینی ؛ محمد بی ریا ؛ میرزه محمد علی خان صفوت ؛ عباسعلی صابری؛ محمد حسین هوشی بختیار ؛سید علی آذری ؛جبار باغچه بان ؛ میرزه حسن رشدیه ؛محمد مشیری ؛ نصرت الله فتحی ؛ حبیب ساهر ؛ محمد لو عباسی ؛ علی فطرت ؛ و یوزلر بو کیمی قدر شاعیر و یازیچی لار کی اونلارین یازی لارینین و شعرلرینین طالع لریندن بوگون هئچ بیر کسین خبری یوخدور. ایندی اونلارین باشینا نه گله جک  الله بیلیر .  بیر زامان کیتابلاردا بسم الله داشینین ماجرالارین اوخویاندا بو گون عینا او مسئله گوزومون اونونه تیکیلیر . سون واخت لار بلاخره قسمت اولدو خوراسانلی میرزه سنگلاخین دوغروتدوغو او داش اوزونه باش داشی اولسون . اما بو یازیق شاعیر و یازیچی لارین کی بئله اولاسی دئییل . گلین بیزده بیر دب کیمی هره میز بیر ادبی وصیت نامه یازیب بیر کیمسه نی یا بیر جمعی اوز یازی – پوزولاریمیزا ماذون ائده ک تا ایلر بویو یازیب یاراتدیغیمیز اثرلر اورتادان گئتمه یب ؛ یئری گلمیشکن بیر طرفده قورونوب یا چاپ ایمکانی تاپا بیلسینلر . البته بو شرط ایله کی او تاپدیغیمیز آدام دوغروسو ایشله ین و سوزونون اوستونده دایانان اولسون .  بورادا سیزدن بیر سوغوم وار . نه تهر ائله مک اولار کی بو قوجامان عالیم لر اوزلری دیری کن بیر پیتیک یازیب بیر نفری صاباحا ماذون ائتسین لر ؟ بو  ایش منجه چوخ اونملی دیر و خواهیش ائدیرم جدی توتاق . بو گونشلر هامیسی دووار باشیندا اوتوروب لار . گوزووو چئویردین دوواری آشاجاق لار . .  اوندا ایکی الیمیز اولاجاق ؛ بیر باشیمیز . بو قونودا دوستلارلادا آرتیق دوشونمه لی ییک .

سایغی لاریم لا – سیزین همراز

تبریز – 19/4/90