یئنی نشر اولان آلتی کیتاب

 

رضا همراز

 1-      طرابزون اوزه رینده نوت لار :

سون گونلر طرابزون شهرینده ایشیق اوزونه چیخان همین کیتابین یازاری ؛ بیلگین عالیم دوقتور انور اوزون اولموشدور . دوقتور انور اوزون بو سون اثرین 178 صحیفه ده بیتیره بیلمیشدیر . طرابزون اوزه رینده نوت لار کیتابیندا 14 باشلیق گئتمیشدیرکی اوزلوک لرینده ماراق دوغوران قونولاردان عیبارت دیرلر . باخین :

1-    طرابزوندا دده قورقود ایزلری

2-    طرابزوندا ایران مکتبی و آذربایجانلی تقی رفعت

3-    طرابزون و تبریز تجارتی

4-    و ... بو مووضوع لاریندان دیرلار . سایین معلیم دوقتور انور اوزون جنابلارینا بو دیرلی ایشینه گوره اللرینیز آغری ماسین دئییب ؛ باشقا اثرلرینین یولون گوزله ییریک .

 

2- هئریز ( هریس ) :

داها آرتیق بیر شاعیر کیمی تانیدیغیمیز اوستاد اسماعیل محمد ثانی " ممدلی " نین سون گونلر هریز فولکولورو حاقیندا بیر 492 صحیفه لیک کیتابینین اوخوجوسو اولدوق . بو کیتابدا آلچاق کونول یازار ایللردن بری توپلادیغی هریزین فولکولوروندان گوزل – گوزل بولوم لر سئچیب نشر ائده بیلمیشدیر . حورمتلی یازار چالیشمیشدیرکی هئریزین دیالوقون اولدوقجا قوروسون کی بو اوزلویونده گوزل بیر تشبث دور . عالیم قلمداشیمیزا بو نجیب ایشده ال – قولون آغری ماسین دئیه ؛ باشقا اثرلرینین چاپ اولوب الیمیزه چاتماسین آرزی لاییریق .

 

 3-بنگ و باده :

حکیم فضولی نین ان تانینمیش اثرلریندن دیر کی بو دونه دوقتور حسین صدیقین همتی ایله 102 صحیفه ده بیر نئچه نسخه نین تطبیقی ایله 1389 ایلین سون لاریندا تبریزده یاران نشری واسطه سی ایله چاپ اولدو . کیتاب گوزل کیفیت ده ؛ هابئله علمی وسواس لا اوخوجو کوتله سینین الیه چاتا بیلمیشدیر . بو کیتابین اوخوماغین فضولی سبکینین وورغونلارینا نسگیل ائدیب سایین دوقتور صدیقه ال قولون آغری ماسین دئییریک .

 

4-ائل نیسگیلی :

بو کیتاب داها دوغروسو دوقتور حسین دوزگونون شعر دیوانی دیر کی768 صحیفه ده تهرانین تکدرخت نشری نین همتی ایله گون ایشیغینا چیخمیشدیر . 16 شعر دفتریندن عیبارت اولان بو شعرلری کی 1358 ینجی ایلدن 1382 ینجی ایله قدر چاپ اولموشلار ؛ اوستادین اوغلو ائلدار محمد زاده صدیق بیر یئره توپلامیشدیر . اوزلویوندن بو گوزل تشبثی اوستاد دوزگونه و اوغلو ائلدارا تبریک دئییریک .

 

5-ترکی سرایان عصر صائب تبریزی :

بو کیچیک حجملی کیتابدا صفوی دوورونون اوچ بویوک شاعیری تبریزلی تاثیر ؛ تبریزلی قوسی و تبریزلی عصری نین شعرلری داخیل ائدیلمیشدیر .  بو کیتابی توپلایاندا ائله یورولماز آراشدیریجی دوقتور صدیق جنابلاری اولموشدور کی 1389 ینجی ایلین سونلاریندا تبریزین یاران نشری واسطه سی ایله چاپ و یاینلانمیشدیر . تاسف له تبریزلی شاعیر تاثیرین قالین حجیملی شعر دیوانینا  اونون تورکجه شعرلری داخیل ائدیلمه میشدیر ! . عصری نین ده شعرلری ایله حایاتی حاقدا بیر اوقدر بیلگی میز الده یوخ ایدی . تبریزرلی قوسی نین ده دیوانی چاپ اولسادا آنجاقدا بوگون بازاردا تاپیلا بیله سی ائییل . ساغ اولسون اوستاد صدیقی بو نجیب ایشلرینه گوره .

 

6-دیوان عاجز گرمه رودی ( عاجز سرابی )

 

سارابین ان تانینمیش ؛ عین حالدا مهجور شاعیرلرینین بیریسی ده واختی ایله محمد خلیفه اولموشدور . تاسف له بو اینجه طبع لی شاعیرین یاشایشینا دایر آغیز یاندیران بیلگی الده اولماسادا ؛ خوشبخت لیگ له شعر دیوانی یورولماز تدقیقاتچی دوقتور صدیقین همتی ایله چوخ گوزل بیچیمده سون گونلر الیمیزه چاتمیشدیر . عاجزین دیوانینین ناشری تهرانین تکدرخت نشری اولوب کی 430 صحیفه ده کیتابی شاعیرین خیالی بیر پورتره سی ایله چاپ ائتدیره بیلمیشدیر . عاجرین محکم قصیده لری ایله برابر اینجه غزللری وار . بو شاعیرین یوکسک مقامیندان همین نکته نی دئمک اولار کی او تبریزین مقبره الشعرا سیندا باسدیریلمیشدیر . کیتابین مصححی اوستاد صدیقه اللرینیز آغری ماسین دئیه بو دیوانین اوخوماغین کیلاسیک ادبیاتیمیزین هوسکارلارینا نیسگیل ائدیریک .