کریم آقا صافی نین تورکجه دیوانی نین نشری بهانه سی ایله

رضا همراز

سون گونلر آذربایجان ادبیاتی نین تانینمیش سیمالاریندان اولان کریم آقا صافی نین لیریک هابئله انقلابی شعرلری آز قالا یوز ایلدن سونرا فاخر شکیلده ، تانینمیش ادبیاتچی اوستاد اصغر فردی نین چابالاری اساسدا تهرانین ایز نشری سیراسیندا نشر اولونوب ، صافی نین لیریک شعرلریننین آرزیسیندا اولانلارین الینه چاتابیلدی . هله دوننه کیمی صافی نی یالنیز مرثیه شاعیری تانیانلار بوگون اونون دادلی – دوزلو شعرلری ایله بیرداها آرتیق تانیش اولورلار . صافی نی آشاغیدا تقدیم ائده جه یمیز غزلی گمان کی اونون ان گوزل هابئله گوجلو غزلریندن حسابلانا بیلر :

غزل                         

جمالین نقشینی ایستردی نقاش قدر چکسین

قالیب حیرتده بیلمزدی او صورتده نه لر چکسین

قیام قامتینده گوردو آثار قیامت وار

تعجب ائتدی گئتدی تا موثردن اثر چکسین

مجانین ره عشقه گوروب زنجیر لازیم دیر

چکیب بیر زولف کیم هر تار ده یوز مین نفر چکسین

آییردی زولفدن بیر تئل چکیب سالدی جبین اوسته

سپهر حوسنده ایستردی بیر شق القمر چکسین

جبینین چکدی اما ائیله دی عاشیق لره مقتل

کی هر کس ایسته دی لازیمدی درد ترک سر چکسین

چکنده قاشلارین طرحین هیلال آسا گوروب گردون

بو فکره دوشدو آی نقشین پوزوب نقش دگر چکسین

گوزون بنزتدی بیر آهویه سالدی سونبولستانه

دئدی بو صید الیندن هانسی صیاد ال چکر، چکسین

یئتیشدی صفحه ی رخسارینه قالدی تعجّبده

اوزون هئچ بیلمه دی خورشید چکسین یا قمر چکسین

دهانین اوخشادا گوردو خطادیر نقطه ی میمه

اگر چکسه گرگ اول نقطه دن هم میم لر چکسین

زبس کی قیلدی شیرین کاریلیق چکدیکجه هر نقشین

گول عطری وئردی ایستردی لبین گولبرگ تر چکسین

دوشوب مدهوش « صافی » تک قلم الده قلم اولدو

قیریلدی رشته، مومکون اولمادی نظمه کمر چکسین .

 تبریزلی کریم آقا صافی نین تورکجه دیوانین کی 314 صحیفه ده  اعلا کیفیت ده نشر اولونوب ، الده ائتمک بیر اوقدر ده چتین دئییل .  نییه کی او خوشبخت لیکله تبریزه ده گلیب و تبریزین ارک خیاوانیندا اولان حامد و ساعات قاباغیندا کتابفروشی سپهر کیتابفروش لاریندان الماق اولار . بونلارلا برابر تبریزین شهر کتابندا دا اونون ساتیش اوچون قویوب لار . اوستاد اصغر فردی یه بو گوزل تشبث اوچون ال قولونوز آغری ماسین دئیه ، بویوک شاعیریمیزین دیوانین آلیب اوخوماغی بوتون قلمداشلاریما نیسگیل ائدیرم .