قره بادیمجان :

                                                                                                              رضا همراز

قره بادیمجان بیر شعر دفتری نین عنوانی دیر کی اورمولو طنز شاعیریمیز باباعلی جوانمردین بیر سیرا طنز شعرلرین احتوا ائدیر . بو 228 صحیفه لیک کیتاب ، اورمونون « یاز نشر » نشریاتی واسطه سی ایله اعلا بیچیمده نشر اولونموشدور . شاعیر باباعلی جوانمرده جان ساغلاملیغی آرزی لایاراق ، همین دفتردن بیر شعرین اوخوجوسو اولاق :

موبایل

او زاماندان کی موبایل اولکه میزه قویدو آیاق

هر گئجه صبحه کیمین ائللریمیز قالدی اویاق

 

گوشی اویناتماق اولوب ایندی جوانلاره پئشه

دادانیبلار آتالار دا ، آنالار دا بو ایشه

تانقویا ایستیر هله خان ننه میز ده گیریشه

کل عالمده یقین اعتیاد اولماز بو سایاق

گئدیر اینترنتنه حتی آنا قاینیندا اوشاق

 

توی قوناقلیقدا جومور گوشییه ارواد یا کیشی

چیخا بیلمیر گیریری وای بئره ارکک یا دیشی

گوشیسی الده اونون قالماییب آغزیندا دیشی

نوجوان آختاریر اونلان دا بیزیم گای باجاناق

نه ائوی وار نه ایشی بیلمیری هاردا قالاجاق ...