رحمتلی میر حسین قولو ریاحی فرین مطبوعاتیمیزدا ایلکین شعری

رضا همراز

یازیچی لیغین یا شاعیرلیین شوبهه سیز بیر پایاسی دا انسان اولماقدان آرتیق پای آپارماق دیر. قلمداشیم رحمتلی میر حسینقولو ریاحی فر « سید» منجه یازیچی لیقدان هابئله شاعیرلیکدن پایی نه قدر اولسایدی ، انسانیت دن قات قات آرتیق ایدی . بو سوزه امینم کی بیر کیمسه نین اوره ینه او یئرسیز توخونمامیشدیر . مجلس لرده ادب – ارکان لا اوتوروب ، دانیشدیرماینجا دانیشمازدی ، دانیشاندا دا چوخ آز و فایدالی دانیشاردی . او ذات عالی ایله سون گوروشوموز وفاتیندان آی یاریم قاباغا قایدیر . تورک دونیاسینین اویوندویو اوستاد حیدر عباسی « باریشماز » اوچون قورولان قورولتایین قوناقلارینین بیریسی ده ائله دوستوم ریاحی فر ایدی . اونونلا بیزیم دوستلوغوموز 5-6 ایله چاتسادا ، سانکی 40 ایللیک دوست ایدیک !

انقلابدان سونرا بو عالی جنابین باشینا یئرسیز یاغدیریلان تهمت لردن او دوستلارینین یانیندا اینه اوجو قدری ده گیلایه ائتمه یب ،همه شه باشین اوجا توتاردی . اونا سویله نیل یاراماز تهمت وورانلار اوزلری ده سونرالار گور – پئشمان اولسالاردا ، آتالار دئمیشکن سونکو پئشمانلیق بره بیتیرمز آنجاق !

من بورادا ایستردیم اونون مطبوعاتدا نشر اولان ایلک شعرینه توخونام . منیم آرایب ، آختاردیغیم تحقیق لرین اساسیندا اوستاد ریاحی فرین ایلک شعری تبریزده نشر اولونان دده قورقود درگی سینین ایکینجی ایلینین ، بیرینجی سایندا کی 61 ینجی ایلین اردی بهشت آیندا اوجا هابئله قوجا تبریزده نشر اولونموشدور . بونون آردی جا اونون ال -قولو قیزیب سونلارلا ایسه بیر سیرا مطبوعاتدا شعرلری ایله یازی لاری گون ایشیغینا چیخادیریلمیشدیر . البته او بو شعرلره قناعت ائتمه یب سونرالار اوچ کیتابی دا نشر اولماق توفیقی کسب ائده بیلمیشدیر . سیدین شعرلری  لیریک اولسایدی لار دا ، سونرالار داها چوخ اجتماعی مضمونلی شعرلر یازیب ، خالقینا اوز بورجون بئلچی اوده مک ایستردی . سید همین اجتماعی یا ساتیرا فورماسیندا اولان شعرلرین « موزالان » امضاسی ایله  نشره بوراخاردی . نه یازیق کی او عومور – گونونون ان بیشمیش چاغیندا دونیاسین دگیشدی . روحو شاد مزاری نور ایله دولسون . یازیمیزن بو حیصصه سینده اونون مطبوعاتا قدم قویدوغو ایلک شعرین کی بویوک صابریمیزین معروف شعرینه نظر سالیب او ریتم ایله سویله میشدیرکی بورادا سیزلره تقدیم ائدیرم .

توکان شئیی منیم دیر ساتانمارام ال چکین !

شنبه گونو کوچه ده اولدو بویوک قیل و قال

قند و شکر ایسته دی بیزدن او مشدی هلال

مشدی هلالین سوزو ائتدی منی چوخ ملال

من اوجا سسله دئدیم بوشلا بیزی مش هلال

توکان شئیی منیم دیر ساتانمارام ال چکین

ساتیلسا جنسیم منیم یاتانمارام ال چکین

***

دوزودو توکان قابلاشیب ترمه ایله شال ایله

« وینستونو » « بهمنی » دگیشمه رم بال ایله

مهر و موم ائتدیم اونو ساتمارام هئچ سال ایله

دوم آغ اولوب ساققالیم من اوینامام آل ایله

نقد پولومو الیمدن آتانمارام ال چکین

توکان شئیی منیم دیر ساتانمارام ال چکین

***

دونن قولاق آسمیشام صدای آمریکایا

اوون شیرین سوزلری اینان کی گلمز سایا

او سویله دی آی بالا  یاخین ناما ،ریکایا

اوجوز ساتیلسا جنسین یقین گئدرسن دارا

پس حالالا حارامی قاتانمارام ال چکین

توکان شئیی منیم دیر ساتانمارام ال چکین

***

یقین کی سیز بیلیرسیز بو ایل گئتمیشم حاجا

آمما یئنه باغلی یام من او داغیلمیش تاجا

گوزوم گوتورمز باخام یوخسولا یا محتاجا

دیله یمه آرزیما چاتانمارام ال چکین

توکان شئیی منیم دیر ساتانمارام ال چکین

***

مشدی صفر سویله ییر توکان شئیین سات گینان

قوروما اوز قانیوی ملتینن قات گینان

ملتی نن قال اویاق ملتی نن یات گیلن

امریکانین دوستلوغون بیر کره لیک آت گیلان

یوخ بئله بیر ذلته باتانمارام ال چکین

توکان شئیی منیم دیر ساتانمارام ال چکین

***

سویله دی یوخسول « حسین » من حاجیا مختصر

آی حاجی تاپ ملتی یوخسا دامارین کسر

کوکره سه ائللر سئلی آمریکا قورخار  اسر

امریکا دان بیر کلام قالمایاجاقدیر اثر

یوخ داهی بو ملته باتانمارام ال چکین

توکان شئیی منیم دیر ساتانمارام ال چکین .

تهران . میر حسین ریاحی فر