فریدون ابراهیمی ایله امامیه ده گوروشوموز !

رضا همراز

جوما آخشامی 10/12/96 ائلمیزین هابئله مرثیه ادبیاتیمیزین چاغداش شاعیری اوستاد قهرمان حیدر خطیبی نین گنج بالاسی نین قیرخی ایدی . بو ارزی گوز بالانی قیرخ گون قاباق چولاق قالمیش بیر سوروجو نامرجه سینه ماشینی ایله ووروب قاچمیشدیر . بوگونه کیمی ده هئچ بیر دوربین اونو گورمه یب !

هرحالدا بو یاس توره نیندن چیخاندا دوستلارلابیرگه دولانماق هوسی باشیمیزا ووردو . یول اوسته دوستلارین بیرین سالیب سوردوک شاهنازین آخرینه طرف . بیر اوندا گوردوک امامیه نی رد اولوروق کی دوستلارین بیریسی دئدی : گلین جوما آخشامی دی بو قبرستانداکی لارا دا فاتحه اوخویاق . قبول ائله دیک . ماشیندان دوشوب قبرستانین ایچری سینه گئتدیک . تاسف له مزارلارین بیر چوخو جوموب ، یاخشی بیر وضعیت گورمه دیک . من  تاریخ هوسکاری کیمی بویوک لرین مزارین گزیدیم . ائله دوستلاردا . رحمتلی قافقایچی ، حسین امید ، صمد بهرنگی ، ستارخانین اوغلو یدالله خا ن و بیر نئچه باشقا نفرلره ده اوزل لیک له فاتحه اوخودوق .

قایدان باش دئدیم فریدون ابراهیمی نین ده مزاری بورادا دیر ، گلین اونادا بیر فاتحه وئرک . ائشیتمیشدیک کی او قبرستانین آخرطرف لرینده دیر . هر طرفی آختاردیق مع الاسف تاپا بیلمه دیک . هاوانین شاختاسی بیزی یاواش یاواش اومودسوز ائدیردی کی تئز قایداق . دوستوم یوتویوبو آچیب او مزاره عاید بیر فیلمه باخدیق . آنجاق یئنه تاپیلمادی کی تاپیلمادی ! خلاصه بو حین ده دوستوم دئدی آی بالا بورادان بیر قوخو گلیر !

-        دئدیم آی جانیم نه قوخوسو بوراداکی مزارلار یئتمیش – هشتاد ایلین مزارلاری دیر نه ایی گله جک ؟

-        یوخ والله من بیر قوخو حیس ائدیرم . دای دینمه یب ، اسکی قبرستانین قاپیسنا طرف یوللانیردیق کی بیردن او بیری دوستوم دئدی : هه تاپمیشام . دایانین . اینانیلماز حالداگوردوک دوز فریدون ابراهیمی نین سویوق و غریب مزارینین ایکی مترلیینده دایانمیشیق . دوستوم اوزون منه توتاراق دئدی : تاریخچی قارداش یازدی ! من تاپمیشام ! بیر از گولدوکدن سونرا  ، اوتوروب مزارین قیراغینا بیر حمد – سوره تلاوت ائیله دیک . سونرا دوستومون او قوخو قضیه سین من باشا دوشدوم . سانکی فریدون ابراهیمی اوزو بیزی چاغیردی !

مزارین باشیندا اوتوروب دوستوم ال آتیب کامراسینا بیر شکیل چکه چکه فریدون ابراهیمی ایله اورک ائوینده دانیشماغا باشلادیم .

-        هه آقا فریدون نه خبر راحات سیز ؟

-        بلی الله سیزدن راضی اولسون چوخ راحات

-        آقا فریدون سیزین اثرلرله نئجه تانیش اولا بیله ریک ؟

-        آی جانیم سن کی تاریخه هوسلی سن ! بیر خاطراتیم وار کی آلماندا نشر اولوب . بیر او آذربایجان تاریخی دیر کی فرقه دورو مسلسل اولاراق گونده لییمیزده نشر اولوب ، بیر ده بوگونلر منیم حاقیمدا ابراهیم دارابی دورد جلد کیتاب یازیب کی اونلارین ایکی جلدی نشر اولوب ، ایکی سی ایسه یاخین گله جک ده نشر اولاجاق .

-        آقا فریدون بو اوستاد دارابی یازان کیتابلار نه موضوع لاری داشیرلار ؟

-        اونلار ائله اوستادین او بیری کیتابی کیمی « اشک سبلان » رومان سایاغیندا دیر .

-        چوخ گوزل انشا الله تاپیب اوخویاریق .

-        بیرده یادیمدان چیخدی ، ائله هوله سک اولدوم کی سفرنامه می اونوتدوم دئیم !

-        آقا فریدون ایندی سیزین سلاله دن قالان وارمی ؟

-        آی جانیم نیه یوخدور . منیم نوه م بویوک معارف پرور میرزه حسن رشدیه نین نوه سی ایله حایات قوروب لار

-        به به نه گوزل بیر تشبث . الله مبارک ائیله سین

-        نه یی مبارک ائیله سین ؟ اونلارین اوزلرینین آز قالا نوه – نتیجه لری وار!!

-        منظوروم بو ایدی کی خوشبخت اولسون لار  .

-        ائله اونلار خوشبخت دیرلر . سن نیاران اولما !

بو حین ده مسجدین اذان سسی قولاغیما دیب ، دوستلار دئیرلر  دور بالا  - دور . چول پالازیوی یغ گئدک . بایاخدان دئییردین اوشویورم ، ایندی بیر ربع دور بورادان آسلانمیسان !

و بئله لیک ده آقا فریدون ابراهیمی ایله دانیشاندان سونرا  خدا حافظ لیک ائدیب ائویمیزه طرف یوللاندیق .

-