آذربایجانلی مبارز قادین لاریمیزدان

تبریزلی راضیه خانیم ابراهیم زاده

رضا همراز

آذربایجانین مبارزه تاریخینده قادین لارین سایی آز اولموشسادا ، دقته لایق و دیرلی و نئجه دئییرلر ایز بوراخان اولموشدور . حله تانباکی حرکاتیندا زینب پاشانین جومرد لیکین یاددان چیخاردان اولمامیش دیر . اوندان بو طرفه ایسه تئللی زری دن توتدو ، سریّه خانیما کیمی اونلار جسارتلی قادین دان سوز – صحبت آچماق اولا بیلر . اردبیلین ثمرین کندیده یاشایان میللی حکومت چاغیندا سریه خانیمین فیکیر داشی ایله سیلاحداشلاریندان اولان بیریسی ده راضیه خانیم غلامی یا همان تبریزلی راضیه خانیم ابراهیم زاده اولموشدور . رحمتلی راضیه خانیم ابراهیم زاده 1304 ینجی ایلینین اردی بهشت آییندا اوجا تبریزده آنادان اولوب ، 16 یاشینداکن تانینمیش سیاستچی و 53 نفرین بیریسی اولان رضا ابراهیم زاده یه حایات یولداشی اولوب ، مبارزه یولوندا اونونلا چیگین - چیگین  گئدیر . آذربایجاندا 1324 ینجی ایل باش توتان میللی حوکومت دن استقبال ائدیب اونا قوشولور . آنجاق شاه رژیمی آذربایجانا یوروینده اودا تهراندا دالدالانیر . مبارز یوللاریندا ایللر بویو دوستاقدا قالیب ، سورگون اولوب و گیزلی یاشاییر . بو شهردن او شهره ، بو اولکه دن او اولکه یه  گئتمه مجبوریتینده اولور . انقلاب ظفر چالدیقدان سونرا 59 ینجی ایل وطنه قایدیر . بیر آز قالاندان سونرا یئنه وطنی ترک ائتمک مجبوریتینده اولور . راضیه خانیمین خاطیره لرین اوخودوقدا ائله دوغرودان زینب پاشا حده جسارتلی بیر قادین گورمک ائله جه ده یئرسیز دئییل . آنجاق زینب پاشا یا باشقا کئچمیشده کی قهرمان قادین لاریمیزلا بو قادینین منجه بیر اساسلی فرقی وار ایدی . اودا بو کی راضیه خانیم ساوادلی و مفکوره لی بیریسی اولوب ، یازیب – اوخوماق امکانی اولدوغونا گوره گوزه کلیم آتدیملار آتا بیلمیشدیر . 9 ایل اری نین اولوسوندن – دیری سیندن خبر سیز اولسادا 1955 ینجی ایلین  اکتبر آییندا ماسکووانین دمیر یولوندا بیر بیرلرین یئنه تاپیرلار ! حایات یوللاریندا راضیه خانیمین باشینا اوکی چتین لیک وار گلیر . اما او قهرمانجا اونلاری بیر – بیر باشیندان آشیریر . تبریزلی راضیه خانیم عومرونون سون چاغلارین آلمانیانین کلن شهرینده کئچیریب ، ائله او شهرده ایسه ایکی ایل اونجه دونیاسین دگیشیب اورادا باسدیریلیر . اونو ایرانین بیرینجی سیاستچی قادینی کیمی آدلاندیرمیشلار . بو گون اونون 90 یاشا دولدوغونا گوره تورکجه بیر یازیسین  تقدیم ائدیریک . بو یازیدا اونون نه درجه ده بیلگی سی هر اوخوجویا آپ – آیدین گورونور . البته او تقدیم ائدن آمارلار نه درجه دوز اولوب – اولماماسیندان بیزیم خبریمیز یوخدور . اما صلاح گوردورک اونلاری اولدوغو کیمی تقدیم ائدک . یالنیز بیر سیرا یازی قایدالاری بوگونکو روالدا یازیلدی . راضیه خانیمین نشر اولونان خاطیره لریندن دولایی بیر سیرادا باشقا یازی لاری اولموشدور . بو یازی لاردان علاوه  اوندان بیر سیرادا مصاحبه لرده بیزه یادگار قالمیشدیر . ماراقلی دیر کی بو یازی لارین ایچره اونون آنادیلینده ده یازی سی اولموشدور . آشاغیدا همین یازی نی تقدیم ائدیریک .

« وطن اوغروندا جبهه لرده ، جبهه آرخاسیندا قهرمانجاسینا  و ووروشانلارا آلاولو سلام ! عزیز دوستلار . اجازه وئرین اوز بالالاریمیزین گونو مناسبتی ایله سیزی اورکدن تبریک ائدیب و اونلارین تعلیم و تربیه سینده بویوک موفقیتلر آرزو لاییم .

اوشاق گونو نئجه یارانمیشدیر و نه اوچون دور ؟ اوشاقلار غنچه کیمی دیر ، گوزل باغلارین گول – چیچک لری کیمی اونلاری پرورش و بسله مک لازیم دیر . اوشاقلارین تعلیم و تربیه سی اوچون و سلامت لیی اوچون بوتون شرایط لر یارانمالی دیر . محض بونا گوره ده بیرلشمیش ملت لر تشکیلاتی نین ( سازمان ملل متحد ) « حقوق بشر » اعلامیه سی اساسیندا دونیا قادینلار تشکیلاتی و دونیا جوانلار تشکیلاتی طرفیندن 1950-1329 ینجی ایلده هر ایلین 1 ژوئن – 11 خرداد دونیا اوشاق گونو اعلان اولونموشدور .

بوگون اونا گوره یارانمیشدیر کی اوشاقلار حوقوقوندان هر یئرده دفاع اولسون . چونکو دونیانین چوخ یئرلرینده اوشاقلاردان محروم و حقوقسوز بالاجا انسانلار دیرلار . اونلار اجتماعی – سیاسی تعلیم جو تربیه و بهداشت جهتدن بویوک فلاکت لره مبتلا دیرلار . اوشاقلاری بو دهشتلی وضعیتدن خلاص ائتمک اوچون و بوتون دونیانین مترقی انسانلارینین نظرین جلب ائتمک اوچون دونیا مترقی تشکیلات لار طرفیندن مختلف تدبیر و چاره لر گورونور . بو تدبیرلردن بیرینده 1355 ینجی ایلده بیرلشمیش ملت لر تشکیلاتی طرفیندن اعلان اولموشدور کی بو مناسبت له همین ایلین یای فصلی نین آخریندا دونیا اوشاق کنفرانسی کئچیریلدی . بو کنفرانسدا 130 مملکتدن 700 نماینده هیئت لری اشتراک ائتمیشلر و کنفرانسا گزارش وئرن « فریدا براون » دونیا قادینلار تشکیلاتی نین رئیسی ایدی . اونون وئردیگی گزارشینه گوره دونیادا 2 میلیاردا یاخین اوشاق وار کی اونلارین چوخودا دالی قالمیش مملکت لرده دیرلر کی اورالاردا یئمک ، پالتار ، فرهنگ و بهداشت و ایش منبع لری کفایت قدر یوخدور .

اوشاقلاردا هر بیر مملکت ده او یئرین اجتماعی و سیاسی و اقتصادی وضعیتیندن آسیلی اولاراق ایکی یئره بولونور . بیر از قسمی دونیانین هر بیر نعمتیندن استفاده ائدیر و اکثریتی ایسه هر بیر عادی یاشایشا لازیم اولان نعمتدنده محروم دورلار . اعلامیه جهانی کودک اساسیندا بوتون دونیا اوشاقلاری نژاد ، رنگ ، جنس و مذهبی نظره آلمادان عاطفه یه ، محبته یا حتی حیات سورمه یه ، طبی خدمت لره ، مجانی تحصیله ، اویناماغا ، صلح و دینج شرایطده یاشاماغا حق لی دیرلر . آنجاق گورک دونیا اوشاقلاری بو حوقوقلارا صاحب اولوب لار ؟ او مملکت لرده کی انسان استثماری انسان طرفیندن آرادان گئدیب دیر و خلق لر اوز سرنوشت لرینی اوزلری تعیین ائدیرلر ، اوشاقلار دا بوتون یوخاریداکی گوستریلن حقوقلارا مالک دیرلر و حتی اوشاق آنا بطنینه دوشندن تا 15 یاشینا قدر خصوصی اوشاق حکیم لرینین نظارتی آلتیندا بویویوب و مهد کودک و کودکستانلار، مدرسه لر ، اوردوگاه لار ، ورزش مئیدان چالاری ، کلوب لار و غیره استراحت و اویون ائولرینین قاپیسینی اوزلرینه آچیق دیر . لاکین دونیانین بیر چوخ مملکت لرینده اوشاقلارین تام اکثریتی هله ده چوخ پیس و دهشتلی شرایط ده اولوم – دیریم وضع ده یاشاییرلار . بوباره ده کنفرانسا وئریلن آماری نظردن کئچیررک دونیادا هر گون 340 مینه یاخین اوشاق آنادان اولور . 2 میلیاردا یاخین اوشاق وارکی بونلاردان 600 میلیونی یوخسول دور . 200 میلیون اوشاق هر گون آج قالیر . هر ایل 100 میلیون اوشاقدان 70 میلیون نفر دوقتورسوز – داواسیز دونیایا گلیر ، کندلرده اوشاقلارین هر یوز نفرده 85 نفری حتی تمیز ایچمه لی سو تاپمیرلار و هر 5 اوشاقدان بیری بئش یاشینا چاتمادان اولور و هر ایلی یوز میلیون دان چوخ اوشاق ویتامین اولمادیغی نتیجه سینده کور اولورلار . غرب مملکت لرینده یوز مین لر له اوشاقلار اقتصادی بحران لار ، تورم و ایش سیزلیک نتیجه سینده قوربانی اجتماع اولوبلار . فحشا و ولگردلیک و معتادلیق اوشاقلار ایچینده فلاکت یارادیر . جنگ و محاربه ده اوشاقلار اوچون داها بویوک بیر تهلکه یارادیر . مثلاً آمریکانین تجاوزی ویتنامدا 900 مین اوشاغی یتیم قویوب و اسرائیلین تجاوزی لبنانین جنوبوندا فلسطین اردوگاه لارینا چوخلو قادینلارین و اوشاقلارین اولومونه و یا آواره و سرگردان اولماسینا سبب اولموشدور . شیلی ده فاشیست پینوشه دژخیمی 600 مین دن آرتیق اوشاغی بی سرپرست قویموشدور . بیزیم اوز عزیز وطنیمیزده صدام خائن و جنایتکارین تجاوزی نتیجه سینده ایکی میلیونا یاخین خانواده اوز یوردلاریندان اوزاق دوشوب کی اونلارین شاید یاریسی اوشاقلاردیر . یقین بو ظالمانه جنگ ده مین لرجه اوشاقدا بی سرپرست قالمیش لار . عمومیت له جنگین صدمه سی بیرینجی نوبه ده اوشاقلارینی بورویور .

کورت والدهایم دئمیشدیر کی « گرک دونیانین هر بیر یئرینده بئله بیر برنامه لر قورولسون کی اوشاقلاردان هر طرف لی مدافعه اولونسون » او قئید ائتمیش دیر کی ، او دونیادا کی بیزیم اوشاقلار بویویورلر گرک بئله دونیا اولسون کی اورادا ذخائر ملی عادلانه بولونسون و حیات همکارلیق و دوستلوقلا ادامه تاپسین نه دعوا و جنگ له ، گرک صلح جنگه غالب گلسین .

لاکین اوشاقلارین حیاتینی تامین ائتمک اوچون هئچ بیر تدبیر و برنامه نین نتیجه سی اولا بیلمز مگر اینکه طبقات آرادان گئتسین ، استعمار و استثمار محو اولسون و صلح خلق لر آراسیندا ابدی اولاراق بر قرار اولسون و خلق لر اوز مملکت لرینده صاحب اختیاری اولوب گله جک نسلین یعنی اوز عزیز بالالارینین سلامت و خوش بخت لیگینی تامین تامین ائتمک له چالیشسینلار . معاصر دورده بویوک مبلغ لر سلاح و مختلف اسلحه لر اوچون صرف اولور . بو مبلغین بیر آز حیصه سی 200 میلیون آج اوشاغی دویورا بیلر . گلین مقایسه ائده ک : بیر جنگنده F 14 هین مخارجی 9 مدرسه نین خرجی ، بیر تانک لئوپاردین مخارجی 36 اوچ اوتاقلی آپارتمان خرجی و بیر زیردریائی هسته ای نین مخارجی ایسه 16 میلیون اوشاغین خرج تحصیلی دیر . بیر سوز له هر ایل 400 میلیارد دلار خرج سلاح اولور و اون میلیون اوشاق محرومیت دن اولور اگر بوتون بو مبلغ لر له ائولر دوزلسه ، فرهنگ و بهداشتی ایش لره صرف اولسا دوغروداندا بشریت بویوک آددیم لار لا سعادت و خوشبخت لیکه ساری ایره لیه بیلر .

دئدیک بهداشت . گلین اوشاقلارین بهداشتی جهت دن وضعیت لرینی نظردن گئچیرک : معاصر دورده دونیادا 5 میلیون اوشاق دیفتری ، سل ، قیزیلجا ، گوی اسکورمه و آیری ناخوشلوقلاردان تلف اولور . یونسکو گزارشینده دئییرلر کی آسیا و افریقا دا هر بیر 20 اوشاقدان فقط بیر نفری بهداشتی شرایط دن استفاده ائده بیلیر . شعبه بهداشت پان آمریکن گزارشینده دئییلیرکی آمریکای لاتین ده 10 ایل عرضینده 7 میلیون اوشاق حکیم سیز لیکدن اولموشدولر . آمریکا کیمی اولکه ده بومی اوشاقلارین یوزده 40 نفری واکسن اوزو گورمورلر .

تعلیم و تربیت و بهداشت بیر بیریندن آیرلماز دیرلار . سوادلانماق انسان سلامت لیینده بویوک رول اوینایر . لاکین اوشاق لار دونیانین اکثر یئرلرینده تحصیل علم و دانش و حتی سواد لانماق جهتدن دهشتلی بیر وضعیت ده دیرلر . خصوصی ایله دالی قالمیش مملکت لرده هر اون اوشاقدان 9 نفری حتی یازیب اوخوماغی دا بیلمیرلر . آمریکا کیمی مملکتده 5 میلیون اوشاق مخصوصاً بومیلر مدرسه دن محروم دورلار . 12 میلیون اوشاق ایسه فقط 8 ینجی کلاسا کیمی اوخویا بیلرلر . آلمان فدرال دا هر یوز نفر دانش آموزدان 63 نفری روانی ناخوشلوغا مبتلا دیرلار . فرانسه ده 800 مین اوشاقدان فقط 60 مین اوشاق مهد کودک - ه یول تاپابیلیر .

اوشاقلارین ایشله مک مسئله سی ده اکثر مملکت لرده بویوک بیر فلاکت دیر . زحمتکش طبقه لرین بالالاری لاپ کیچیک یاشلاریندان نیمکت دالیندا اوتورماق عوضینه کارخانالاردا ، فرمالاردا ، چوللرده ، مزرعه لرده و بخار و دمیرچی دکانلاریندا ایشه مه یه باشلاییرلار و علم و تکنیکین ترقی سی نین سایه سینده اوشاقلارین استثماری داها آرتیق طاقت فرسا اولموشدور . براون اوز نطق اونده دئیر : بئکار چیلیق بحرانی بوتون دونیانی توتسادا سرمایه دارلار کارخانا فرمه صاحبلری داها چوخ اوشاق لاری ایشله دیرلر چونکو اونلاری بویوک لردن آرتیق ایشله دیب و حددن آز موزد  وئریرلر . اوشاقلار هله ده بعضی آمریکای لاتین و آفریقا و آسیا مملکت لرینده برده کیمی دیرلر و حتی تایلند ده هر اوشاغی 80 دلارا ساتیرلار و صاحب لری یاریم قارین یئمک وئرمیرلر اونلاری نئجه ایسته ییرلر ائله ده ایشله دیرلر . تایواندا اوشاقلار گونده 14 ساعات ایشله ییرلر . کلمبیادا 3 میلیون اوشاق ایشله ییر ، هندوستاندا  8-13 یاشلی اوشاقلار هر گون کیلومترلرله یئر آلتی بوروخ – بوروخ دالانلاردا ایمه ک لی یه ایمه ک لی یه داش کومور یغیرلار . اوشاقلار فقط او مملکت لرده کی خلق لری  گونش کیمی پارلاق و آزاد بیر حیات قوروبلار یا غیر سرمایه داری یولی ایله آیدین و ایشیقلی افقه ساری ایره لییرلر  ، سعادت و خوشبخت لیه چاتمیشلار . بو مملکت لرده حقیقتاً ده دئمک اولار کی ، بیرلشمیش ملت لر تشکیلاتی نین اعلامیه حقوق کودک تام معنادا حیاتدا تطبیق اولموشدور . بو مملکت لرده ممتاز طبقه فقط اوشاقلاردیر . توتاق بیزیم قونشو مملکتی ، اورادا اوشاقلار اوچون بوتون شرایط لر بهداشتی و فرهنگی جهت دن یارادیبلار . مهد کودک ، کودکستانلار ، اوشاق کلنیکالاری مدرسه لر هر بیر محلده و موسسه یانیندا تشکیل اولوب متوسطه تحصیلی بوتون اوشاقلارا اجباری دیر . اوشاقلارین 16 یاشینا قدر ایشله مه یه حقی یوخدور . 18 یاشینا قدر گونده 5 ساعات ایشله یه بیلر . بو یئرده 150 میندن چوخ مدرسه واردیر کی 50 میلیون اوشاق تحصیل ائدیر . درس کیتابلاری اونلار اوچون مجانی دیر . 800 مین دن چوخ اوشاق کیتابخانالاری 150 مین مدرسه لرده کیتابخانالار واردیر کی اوشاقلار هر طرفلی اوندان استفاده ائدیرلر . هر ملت اوز آنادیلینده تحصیل آلیر . بو مملکتده اوشاقلار 6500 مرکز ورزشی دن مجانی استفاده ائدیرلر . بورادا بیر میلیونا یاخین اوشاق حکیمی و 6000 اوشاق مریض خاناسی ، 15 مینه قدر استراحت اوردوگاهی واردیر کی اورتا حساب لا 13 میلیون پیشاهنگ هر ایل بو اوردوگاهلاردا استراحت ائدیرلر .

بو مملکت لرده آنا و اوشاقلار خصوصی دقته و مراقبته مالیک دیرلر . مثلاً هر آنانین زایمان مرخص لیگی بوتون حقوق و مزایادان استفاده ائتمک له برابر دیر . ایندی گورک بیز بو عزیز و مصیبت زده وطنیمیزین اوشاقلاری بویوک خلق انقلایندان اول نه وضعیتده ایدیلر ؟ ایرانی  منطقه نین ژاندارمی ائتمک اوچون داها چوخ آمریکا امپریالیزمی له قووشوب هر ایل 20 میلیارد دلارلا سلاح لار آلمیش و مملکتین دروازالارین خارجی سرمایه لرین اوزونه آچیق قویوب ملتیمیزی فقر و بدبخت لیگه دچار ائتمیشدیر و بیر نئچه یاریمچیلیق و ظاهری باصطلاح  اصلاحاتلار واسطه سی ایله خلقیمیزین باشین قاتماق ایسته ییردی . همین بو شوم سیاستین نتیجه سی داها چوخ اوشاقلاری بوروموشدو . بالالار آراسیندا طبقه لر داها چوخ نظره چارپیردی . دولت لی بالالاری هر بیر تعلیم و تربیت و بهداشتی امکانات لاردان استفاده ائده رک ناز و نعمت ایچینده عزیز گرامی بویوردولر و کاسیب – کوسوب بالالاری ایسه حتی آز بیر نعمات مادی دن محروم قالاراق ، مجبور اولوردولار کی لاپ کیچیک یاشلاریندان دوکانلاردا شاگیرد ، پادو اولوب یا خود کارخانالاردا خصوصی ایله فرش کرخانالاریندا ایشله سین لر . ایرانین بوتون دونیادا ان قیمتلی اولان محصولو فرش دیر کی اورادا بالاجا اوشاقلارین طاقت فرسا زحمت لرینین نتیجه سینده اله گلیر . بو عزیز بالالار هر بیر طبی خدمت لردن محروم قالاراق چوخلاری هنوز 14-13 یاشینا چاتمادان تلف اولورلار و یاداکی تراخم و آیری گوز نوخوشلوغو نتیجه سینده کور اولورلار . وطنیمیزین بویوک بدبخت چیلی یی بیرده بودور کی اوشاق حکیمی تقریباً دئمک اولار کی یوخ ایدی .

ایران خلقی نین یوزده 45 نفری اوشاقدیر . یعنی 35 میلیون اهالی دن 15 میلیون 750 مین نفری اوشاقدیر کی بونلاردان فقط 9 میلیونو مدرسه یه گئده بیلردی کی اونلاریندا یاریسیندان چوخو متوسطه تحصیلینه ادامه وئره بیلمیرلر . ایرانین چوخ یئرلرینده مخصوصاً کندلرده مدرسه تمامی ایله یوخ ایدی . سوادسیزلیق بوتون وطنیمیزی بوروموشدو. ائله بونا گوره ده اوشاقلار ایشه جلب اولوردولار . وزارت وزارت آموزش و پرورشین وئردیگی آمارا گوره کی 1355 ده کیهان روزنامه سینده چاپ اولموشدور ایراندا 61647 مدرسه ده 8 میلیون اوشاق اوخویور او جمله دن 4 میلیون یاریمی ابتدائی مدرسه ده بیر میلیون 283 مین نفری راهنمائی مدرسه ده و نهایت 704 مین 800 نفرده متوسطه ده اوخویورلار دوستلار دقتیزی حلب ائدیرم 15 میلیوندان چوخ بالالاریمیزدان فقط 8 میلیون مدرسه یه گئدیردی . اوندان 4 میلیون یاریمی فقط ابتدائی تحصیلی آلابیلیردی . همین بو رسمی آمارا گوره بوتون مملکتده 2342 کودکستان واریدی کی اونوندا چوخو تهراندا ایدی . مثلاً قم دا 3 ، مهاباددا 8 و تبریزده 26 و چالوس دا فقط 1 کودکستان وار ایدی کی بو کودکستانلاردان فقط دولتلی بالالاری استفاده ائدیردیلر .

بهداشت جهتیندن اوشاقلارین وضعیتی هئچ ده یاخشی دئییل دی . شهرلریمیزده هر بیر مین نفر اوشاقدان 104 اوشاق و کندلریمیزده هر بیر مین نفردن 130 اوشاق حکیم سیز و درمان سیزلیقدان اولورلر . کمیسیون ملی یونسکو نون گزارشی اساسیندا ایران اوشاقلارینین چوخو تراخم ، کچل ، اسهال و انگل نوخوشلوغونا مبتلادیرلار و اوشاقلارین اکثریتی  بله ده مخملک و دیفتری کیمی ناخوشلوقدان اولورلر . 1355 ینجی ایلده کیهان روزنامه سینین درج ائتدیگی آمارا گوره ایرانین اهالی سی چوخ اولان شهرلرده 100-200 دوغوم تختی و سراسر ایراندا هامیسی 594 اوشاق حکیمی وارایدی کی اونلاردان 420 نفری تک اوستان مرکزی ده ایدی و قالان استانلاردا یا تمامیئ ایله اوشاق حکیمی یوخ ایدی و یادا 10 نفردن آز حکیم وارایدی . اوشاق مریض خاناسی فقط استان مرکزی ده 9 دانا و آذربایجان شرقی ده بیر دانا اوشاق مریض خاناسی وارایدی کی بو مرض خانا لاردا فقط دولت لی بالالاری استفاده ائدیردیلر .

اوشاقلارین بالاجا یاشلاریندان ایشله مگی ده بیر ایری ارمغان دیر کی رژیم طاغوت بیزیم جگر گوشه لریمیزه گتیرمیشدیر . میلیونلارجا بیزیم عزیز بالالاریمیز فقر و آجلیق نتیجه سینده بیر تیکه چورک اوچون کرخانالاردا ، کارگاهلاردا ، مزرعه لرده ، هابئله بخار و دمیرچی و باقال دکانلاریندا طاقت فرسا ایش له مشغول اولودولار . بیز اوزوموز شاهد ایک کی مین لرجه بیزیم بالالاریمیز فرش کرخانالاریندا ان عزیز و قیمتی اولان نعمت یعنی گوز ایشیغیندان محروم اولوردولار و یا آغیر ایشلر نتیجه سینده آیاقدان دوشوبلر . اوشاقلار بوتون امکانات رفاهی ، بیمه و مزددن تام معنادا محروم دولار . قلابی قانون کار اوشاقلارین 14 یاشا قدر ایشله ماغینی منع ائتمیش دیر . لاکین بو یالنیز کاغیذ اوستونده ایدی . نئجه کی گوردوک اوشاقلارین فلاکت و بدبخت لیگی تک ایرانا خاص دئییل دی . بوتون او مملکت لرده کی بویوک سرمایه دارلار ، مفت خور لار و بویوک مالک لر حکومت باشیندا خلق لرین سرنوشتی نی نئجه کی اوزلرینین منافعی ایجاب ائدیرسه ، حل و تعیین ائدیرلر و بوتون مصیبت و بدبخت چیلیینده اونلار یارادیرلار . اگر دونیانین اکثر مملکت لرینده اوشاقلارین باشینا گلن بلالار و فجایع لری نی توضیح وئره ک شاید گونلر وقت آپارسین . بیز بوگون یالنیز بیر مقدار بو فجایع و دهشتلی وضعیتدن آمالار گوستردیک . ایندی ایسه گورک بویوک امام خمینی رهبریتی ایله ایران مثل سیز ضد امپریالیست و خلق انقلابیندان سونرا بیزیم عزیز بالالاریمیز حقینده نه ایشلر گورونوبدور .

خوشبختیک کی دونیا اوشاق گونونو چتین شراط ده ده اولساق دا انقلابیمیزین اوچونجو باهاریندا کئچیریریک . لاکین بو اوچونجو باهار بیر شرایطده باشلانیر کی عزیز وطنیمیزین بیر قسمتی بعث فاشیست تجاوزکار لارین چکمه سی آلتیندا و خلقیمیز اقتصادی محاصره ده آغسیر گونلری گئچیردیر . وطنیمیزین هر یئری بویوک بیر جبهه یه دونوبدور . انقلاب و وطن اوز عزیز و ایمانلی اوغلان و قیزلارینی بو جبهه لره چاغیریر . خلقیمیز اوز وطن و جمهوری اسلامی سینی امام خمینی رهبرلیی ایله قوروماق و چتین و آغیر شرایط لره غالب گلمک اوچون مختلف جبهه لرده ووروشور . دونیا امپریالیزمی آمریکا امپریالیزمین باشیندا اولماغی ایله تجاوزکار عراقی بیزیم مملکتیمیزی تاپدالاماق اوچون تشویق ائدیر و ضد انقلابی ، ساواکیلاری و منفور پهلوی دار دسته سینه اوز قولتوغوندا یئر وئریب و میلیونلارجا پول خرج له ییرلر و مختلف توطئه لر قورورلار . لاکین بوتون بو چتین لیک لره باخمایاراق خلقیمیز و رهبریمیز آییقدیر و اوز فداکارلیق لاری ایله بوتون بو توطئه لری فاش و رسوا ائدیب و قهرمانجاسینا دویوش جبهه لرینده عراق فاشیست تجاوزکارلارینی و قاسملو خائن نین دار و دسته سینی تار و مار ائدیرلر و وطنیمیزی و جمهوری اسلامی نی گوز به به یی کیمی قورویورلار و انقلابین الده ائتدیگی ثمره لری داها آرتیق چیچک لندیریرلر . همین بو چتین شرایط لره باخمایاراق جمهوری اسلامی دولتی ، جهاد سازندگی ، جهاد سواد آموزی ، نهضت سواد آموزی ، بسیج و انجمن اسلامی کیمی تشکیلاتلار اوشاق لارا فرهنگی و بهداشتی جهتیندن چوخ ایشلر گورموشلر . بیرینجی نوبه ده جمهوری اسلامی قانون اساسی سیندا عموم خلقیمیزین او جمله دن اوشاقلارین رفاه و آسایشده یاشاماغی و مجانی بهداشت و تعلیم و تربیتی تضمین اولموشدور . ایکی ایل تاریخ مقابلینده حددن از بیر مدت دیر لاکین بو از مدتده ایران دا اولان تمام خصوصی مدرسه لر ملی اولموشدور . 26 مین دن چوخ تازا مدرسه لر کند و شهرلرده آچیلیب 5 مین دن چوخ کندلره برق ، سو ،گاز چکیلیب ؛ حامام ، مریض خانا و درمانگاه لار آچیلیب دیر .

تک بیر 13 ینجی ناحیه ده ایکی تحصیلی ایلینده 28 تازا مدرسه آچیلیب و کهنه مدرسه لردن یوزده 40-50 دستگاهی تعمیر اولوب ، مین دست پالتار، 5 مینه یاخین جوت باشماق ، ایکی مین عینک ، بئش یوز میندن چوخ دفتر شاگردلرین اختیاریندا قویولموشدور . بو ایشلر فقط جهاد سازندگی ناحیه طرفیندن انجام تاپمیشدیر . بوتون مملکت سطحینده ایسه بیر آز مدتده تمام فرهنگ و آموزش و پرورش ـ آریا مهری کوکوندن دگیشیلیب نئچه مین سواد سیزلار سوادلانیب و بیرینجی کلاس شاگردلری بیر میلیوندان ایکی میلیونا چاتمیشدیر . وزارت بهداری نین وئردیگی معلوماتا گوره ایران کندلری نین اکثریتینده بهداشت و درمان شعبه لری آچیلیب ایکی مین بئش یوزدن چوخ کند حکیمی ، آلتی مین نفردن چوخ بهداشت یار و به ورز ایکی مین بئش یوز بهداشتی ائولرده ایشله ییرلر . چوخ تاسف کی هر طرفلی دقیق آمار انقلابدان سونرا مدرسه ، آموزشگاه و مریض خانا و درمانگاه و پرورش گاهلار باره ده یوخدور کی انقلابیمیزین گوزل و شکوفان سیماسینی گوسترسین . لاکین گونده کی روزنامه لر صفحه لری و تلویزیون اکرانی هر گون گورونموش ایش لردن بیزه معلومات اوچون مخصوص مدرسه و پرورشگاهلار یاراتمیشدیر . اوشاقلارین سلامت لیگی اوچون ده ورزش و بدن تربیه سینی گئنیش بیر صورتده تشویق و ترویج اولونور .

بونلار هامیسی بیر جزئی اشاره دیر کی خلقیمیز بیر از مدت انقلابدان سونرا اله گتیرمیشلر . بیز اینانیریق کی انقلابیمیز امام خمینی رهبر لیگی ایله ادامه تاپیر و قطعی غلبه یه کیمی دوام ائده جک . بیز اینانیریق کی خلقیمیزین قهرمان اوغلان و قیزلاری عراق جنایتکار و تجاوزکارلارینی ، خارجی و داخلی ضد انقلابی محو و نابود ائده جک و  وطن و جمهوری اسلامی میزی گونو گوندن شکوفه لندیریب استقلال و آزادلیغی نی داها دا مستحکم ائده جک و اوشاقلاریمیزین اوزونه سعادت و خوشبخت لیک قاپی سینی آچاجاقدیر .اوشاقلار انقلابیمیزین گول و چیچک لری دیر . گلین اونلاردان موغایات اولاق و قویمویاق غنچه کیمی سولسونلار . ائله بونا گوره ده جمهوری اسلامی دولتیمیزی امام خمینی رهبریتی ایله اوشاقلارین تعلیم و تربیه و بهداشدینا الیندن گله نی مضایقه ائتمیر و اونلارین یاخشی شرایط ده یاشاماغی اوچون مختلف تدبیرلر گورورلر .

قوی بو گونشلی وطنیمیز ده اوشاقلاریمیز خوشبخت یاشاسینلار . اوشاقلار بیزیم کله جک نسلیمیزین مستقل و آزاد وطنیمیزین گله جه یی بوگونکو اوشاقلارین الینده اولاجاق . پس اونلارین دوزگون و ساغلام تربیه سی اوچون وار قووه میزله چالیشاق .- راضیه ابراهیم زاده »

قایناقلار :

1-      فصلنامه آذربایجان انجمنی – بیرینجی دفتر ، 1360 – قیش ، صص 139- 148 تهران – دونیا اوشاقلار گونو مناسبتی ایله ، دونیا اوشاقلار گونو مناسبتی ایله آذربایجان انجمنینین فعّال عضوی اولان خانم راضیه ابراهیم زاده نین یکشنبه گونو خرداد 1360 دا انجمن سالونوندا تشکیل اولونموش ییغینجاقدا معروضه سی .

2-          خاطرات یک زن توده ای –  به کوشش و ویرایش بهرام چوبینه ، چاپ اوّل ، زمستان 1381 تهران – نشر پژوهش دادار

3-          سایت اینترنتی B.B.C بهمن 1390 . مصاحبه با راضیه ابراهیم زاده – شهرام دریانی

4-           سایت اینترنتی www.rezahamraz.com