تبریزلی میر یوسف نجمی
تبریزلی میر یوسف نجمی
رضا همراز
هله 10- 12 یاشیم اولار اولماز ، رحمتلی آتام هردن ائوده اوز- اوزونه میزیلدایب بیر شئی لر اوخویاردی . اوز اوشاقلیق دونیامدا اونلاری ذهنیمه یغیب ، منده اوز اوزومه ائله اوخوماغا ، یاداها دوغروسو یامسی لاماغا باشلاردیم . اما بیر گون آتام ایندی دئمه سین دئدی : اوغلوم سن منه باخما بونلاری اوخورام سن اوخوما ! ائشیکده اوخویاسان آجانلار توتار ! عاقلیما چاتار -چاتماز دئدیم بو نه دی کی ؟ به رادیودا نئجه اوخورلار !
دوز دو اوخورلار اما سن سوزه باخ ! ائوده اوخ ائشیکده یوخ ! هئچ بیر سوز دئمه دن سوسدوم ! اما هردن ائله بو اوره یه یاتان ماهنی نی اوزل بیر ریتم ایله اوخویاردیم اوز عالمیمده
آی لار دولاندی – ایللر دولاندی دیرلی آذربایجان گونده لیینین بیر سیرالارین وراقلارکن ، همین ماهنی یا راستلاشدیم . تعجب له بیر نئچه دونه اوخودوم . شاعیرین ایسه تانیدیم . من رحمتلی اوستاد سید یوسف نجمی نی ادبی درنک لرده گوروم شعرلرین دینله میشدیم . او عالی جناب از شعر اوخویوب ، از دانیشیب ، چوخ قولاق آسانلاردان ایدی . بیز گنج لر اونو بیر مرثیه شاعیری کیمی تانیاردیق . حالبوکی اونون بیرینجی درجه لی غزللری ، بوشقابا قویمالی میللی شعرلری ده اولموشدور . نه یازیق عاقلیمیزا چاتمادی کی اونونلا اوتوروب خاطره لرین ائشیدک ، گومان کی باشقالاری دا بو فیکره بیزیم کیمی دوشمه دی لر !!! ائشیتدییمیزه گوره اونون بیر نئچه دفتر غزلی وار کی هله گون ایشیغینا چیخمامیشلار . البته اونلارین بیر سیراسی مللی حوکومت دوورو نشر اولان مطبوعاتدا یئر وئریلمیشلر . اوموروق بیرگون تام غزللری ، میللی شعرلری ایله برابر بیر دیرلی تحفه کیمی آذربایجان ادبیاتی وورغونلارینا ارائه اولونسون انشاالله . دئمه لی یم بو بویوک شاعیریمیز 20 نئچه ایل قاباق دئغولدوغو شهر تبریزده دونیاسین دگیشیب ، همین شهرین تایی گورونمز مزارلیغی اولان مقبره الشعرادا اوزون تورپاغا قویموشدور . دئدییم حاطره نی جانلاندیرماق اوچون همین ماهنی نی سیز عزیزلره ده تقدیم ائدیرم .
همه شه لیم یاشا آذربایجان
آنا یوردومسان ای شالی وطن همه شه لیک یاشا آذربایجان
گولوم بولبولوم گولشنیم وطنینم همه شه لیک یاشا آذربایجان
***
قوم لارین لعل دیر داشلارین مرجان سولارون دُر دور گول لرین ریحان
شرافتلی آددین دور آذرستان همه شه لیک یاشا آذربایجان
***
یئر اوزونده سن گوزل بیر گول سن سنده ساچیب دیر انتقام پرچمین
شئرلرین مسکنی سن سن یقین همه شه لیک یاشا آذربایجان
***
یولوندا اولمک دیر عین سعادت قهرمالار آناسیسان حقیقت
سالیب دور اوستونه سایه عدالت همه شه لیک یاشا آذربایجان
***
آخیب دیر سو کیمی اوستونده قانلار یولوندا جان قویوب چوخلو جوانلار
او قانلاری آلاجاق قهرمانلار همه شه لیک یاشا آذربایجان
***
چاتیب دیر باش باشا اوجا داغلارون جنت کیمی بزنیب دیرباغلارون
سینه دن آز قالیر گئده داغلارون همه شه لیک یاشا آذربایجان
***
دریا کیمی موجه گلیب گوللرین آسلان کیمی آزاد یاشار ائللرون
آچیلیب دیر چیچک لرون گوللرون همه شه لیک یاشا آذربایجان .
من رضا همراز صاحب این وبلاگ تاکنون حدود پانصد مقاله بلند و کوتاه به دو زبان ترکی و فارسی نوشته ، در چندین کنگره حضور یافته ،چندین کتاب ام چاپ و نشر شده اند و چندین کتاب چاپ نشده و یا آماده چاپ دارم .ایمیل من چنین هست: